Matoanteny mihatra
Ny matoanteny mihatra dia matoanteny mitaky fameno zoina iray na maromaro. Izany dia mifanohitra amin' ny matoanteny tsy mihatra, izay tsy manana fameno zoina. Ohatra: "Tia mozika i Donald" (mihatra) vs "Mitsangana i Donald" (tsy mihatra).
Ny fihatra, ao amin' ny fitsipiteny mahazatra, dia heverina ho toetra ankapoben' ny fehezankevitra, izay afindran' ny mpanao mankany amin' ny atao na iharana.
Ny matoanteny mihatra dia azo sokajiana araka ny isan' ny zoina ilainy. Ao ny matoanteny tsy mitaky afa-tsy mpandray anjara roa, izay atao hoe matoanteny mihatra indray mandeha, ary ao koa ny matoanteny mitaky zoina roa, izay atao hoe matoanteny mihatra indroa, dia zoina mivantana sy zoina tsy mivantana.
Ohatra amin' ny matoanteny mihatra indroa amin' ny fiteny anglisy ny matoanteny to give ("manome"), izay mety ahitana lazaiona sy zaoina tsy mivantana ary zoibna mivantana: John gave Mary the book ("Nomen' i John an' i Mary ilay boky").
Misy koa ny matoanteny manana zoina telo atao hoe matoanteny mihatra intelo. Amin' ny fiteny anglisy ny karazana matoanteny toy izany dia manasongadina zoina tsy mivantana sy zoina mivantana ary tarika mpampiakina - toy ny ao amin' ny hoe I'll trade you this bicycle for your binoculars ("Hanakalo ity bisikileta ity amin' ny masolavitrao aminao aho"). Tsy ny fitsipi-pitenenana rehetra no manaiky ny fisian' ny matoanteny mihatra amina zoina telo.
Mety hantsoina hoe "mihatra tsy izy" ny tariky ny mpampiankina izay maneho hevitra mitovitovy amin' izay asehon' ny zoina iray. Ohatra, ny fehezanteny indôneziana Dia masuk sekolah ("Niditra sekoly izy") sy Dia masuk ke sekolah ("Niditra an-tsekoly izy") dia samy ahitana matoanteny mitovy (masuk "miditra"), fa ny fehezanteny voalohany dia manana zoina mivantana nefa ilay faharoa kosa dia misy tariky ny mppampiankina misolo toerana azy. Mety antsoina hoe mihatra indroa tsy izy ny fehezankevitra misy zoina mivantana miampy tariky ny mpamlpiankina, toy ny ao amin' ny fehezanteny lakôta hoe Haŋpíkčeka kiŋ lená wé-čage ("Nanao kiraro ho azy aho"). Ny fandrafetana fehezanteny toy izany indraindray dia antsoina hoe "mihatra saro-drafitra". Ny sokajin' ny mihatra saro-drafitra dia tsy ahitana tariky ny mpampiankina ihany fa misy feghezankevitra miankina na mitampify ary rafitra hafa. Tsy fitovian-kevitra ny mpahay teny momba ny toetran' ny "mihatra saro-drafitra" sy ny "mihatra intelo".
Mifanohitra amin' ny matoanteny mihatra ny matoanteny sasany izay tsy mitaky zoina (zoina zerô). Ny matoanteny tsy mila zoina dia antsoina hoe matoanteny tsy mihatra. Ohatra amin' ny fiteny anglisy ny matoanteny hoe to arrive ("tonga").
Misy ny matoanteny azo ampiasaina amin' ny fomba tsy mihatra na mihatra. Amin' ny fiteny anglisy, ohatra, ny matoanteny to eat ("mihinana"); ny fehezanteny hoe You eat ("Mihinana ianao") (miaraka amin' ny endrika tsy mihatra) sy You eat apples ("Mihinana paoma ianao") (endrika mihatra izay manana ny hoe paoma ho zoina) dia samy ara-pitsipika.