Fielezan'ny fanajana ny Fo Masin'i Jesoa

Ny nanombohan'ny fanajàna ny Fo Masin'i Jesoa

Nanomboka tamin’ny taonjato faha 17 no niely ny fanajàna ny Fo Masin’i Jesoa tato amin’ny Eglizintsika. Anton’ny tena fielezany ny fisehoan’i Jesoa miaraka amin’ny fony masina tamina Masera iray antsoina hoe Marguerite-Marie Alacoque, tao amin’ny tranon-drelijiozy any Paray-le-Monial any Bourgogne. Imbetsaka i Jesoa mampiseho ny fony masina no niseho tamin’io Masera io teo anelanelan’ny taona 1673 hatramin’ny 1675. Ary hatramin’ny taonjato faha 19, dia nisy Masera hafa koa nanambara fa nisehoan’ny Fo Masin’i Jesoa : i Masera Marie du Divine Cœur lehibem-pikambanan-dry Maseran’ny Mpiandry Ondry Tsara, tany Porto any Portugal. Nangataka tamin’ny Papa Léon XIII izy noho ny fanirian’i Kristy voalaza taminy, ny hanokanana izao tontolo izao eo ambany fiarovan’ny Fo Masin’i Jesoa. Neken’ny papa izany fangatahana izany ka dia natokan’ny Papa ho an’ny fo Masin’i Jesoa izao tontolo izao.

Fampodian-kaja amin'ny Fo Masin'i Jesoa

Raha vao miteny ny Fo Masin’i Jesoa dia tsy misaraka amin’izany ny vavaka fampodian-kaja. Tia loatra ny olombelona i Jesoa, na dia be faharatsiana aza eto an-tany. Manoloana izany fitiavana tsy hay lazaina an’ohatra izany dia adidin’ny olombelona tiaviny ny manao fampodian-kaja. Hoy indrindra ny Papa Pie XI ao amin’ny taratasy Ansikilika nosoratany Miserentissimus Redemptor : « Amin’ny fombam-pivavahana atao amin’ny Fo Masin’i Jesoa, ny toe-po midio sy manonitra no isan’ny lehibe indrindra sy manana ny toerana voalohany ». Izany hoe, ny fampodian-kaja no voalohan-draharaha amin’ny fanajana ny Fo Masin’i Jesoa, sy amin’ny vavaka rehetra anehoana fitiavam-bavaka aminy.

Fo Masin'i Jesoa ara-javakanto

Endrika anehoana ny Fo Masin’i Jesoa, amin’ny zavakanto toy ny hosodoko na sarivongana, ny fo mirehitra afo eo amboniny, mamirapiratry ny fahazavan’Andriamanitra. Maratra mandrakariva io fo io satria voatrebiky ny lefona sady voahodidina fehiloha tsilo koa. Fa ambonin’ireo rehetra ireo dia misy hazofijaaliana koa miaraka aminy eo amboniny. Eo amin’ny ivon’ny tratran’i Jesoa no ahitàna ilay fo. Tondroin’ny tanan’i Jesoa misy diam-patsika ny fony. Ny tanany iray kosa toa manolotra azy anao. « Io ny foko tia anao, atolotro anao ka raiso », izany no hevitra azo amakiana ny ambaran’ny sary. Hita taratra amin’io sary fo io, ireo fampijaliana isan-karazany nihatra tamin’ny Tompontsika. Na nampijaliana aza anefa izy, vao maika milodaka sy mirehitra tsy mety maty ny fitiavany, ambaran’ny afo eo amboniny. Ankoatry ny sary samihafa dia misy Bazilika iray lehibe antsoina hoe Basilique du Sacré-Cœur de Montmarte ihany koa any Paris, natokana ho an’ny Fo Masin’i Jesoa.

Fo Masin'i Jesoa ara-baiboly

Araka ny Evanjely dia avy amin’ny nitranga tamin’ny Alakamisy Masina, tamin’ny Sakafo farany niarahan’i Jesoa tamin’ny mpianany no niaingan’ny fanajàna ny Fo Masin’i Jesoa. Araka ny Evanjely Md Joany 13, 23 dia nanakina ny lohany teo an-tratran’i Jesoa ilay mpianatra malalany teo amin’ny sakafo. Mbola io Joany io ihany koa, niaraka tamin’ny Renin’i Jesoa, no nahita ny nandefonana ny fon’i Jesoa teo Kalvery (Jo 19, 34-37). Araka izany dia hatramin’ny andron’ny Apôstôly no heverina ho nanombohan’ny fanasongadinana manokana ny hasarobidin’ny Fo Masin’i Jesoa. Ankoatr’izany dia maro ireo Olomasina milaza ny fifandraisany manokana amin’ny Fo Masin’i Jesoa. Anisan’izany i Mb Catherine de Sienne, Mb Gertrude, Md François de Salles, sns…. I Md Jean Eudes niaina teo anelanelan’ny taona 1601 hatramin’ny 1680 dia efa nanao ny sarin’i Fo Madion’i Maria, avy eo ny sarin’ny Fo Masin’i Jesoa.

Masera Anne-Madeleine Rémusat sy Marie Leszcynska

Anisan’ny olona tsy hadinoana amin’ny tantaran’ny fielezan’ny fanajana ny Fo masin’i Jesoa koa i Masera Anne-Madeleine Rémusat (1696-1730). Niezaka mafy nampahafantatra ny Fo Masin’i Jesoa izy. Nandripaka olona maro tany Marseille any atsimon’i Frantsa ny pesta tamin’ny andron’ity relijiozy ity. Niteny tamin’i Mgr de Belsunce izy mba hametraka ny tanànan’i Marseille sy ny Diôsezy eo ambany fiarovan’ny Fo Masin’i Jesoa. Tamin’ny lamesa tamin’ny 1 Nôvambra 1720 no notanterahina izany. Tsy hadino koa i Marie Leszcynska,vehivavy Poloney, isan’ny nampiely ny fanajana ny Fo Masin’i Jesoa.

Ao amin'ireo Taratasin'ireo Papa

Ankoatry ny nanorenan’ny Papa Pie IX ny fankalazana manetriketrika ny Fo Masin’i Jesoa eran’ny Eglizy eran-tany tamin’ny 1856, dia nisy taratasy Ansikilika miisa telo navoakaan’ireo Papa nifandimby, amelabelaran’izy ny antony anajan’ny Eglizy ny Fo Masin’i Jesoa : Léon XIII, Annus Sacrum, tamin’ny taona 1899 ; Pie XI, Miserentissimus Redemptor tamin’ny 1928 ; Pie XII, Haeurietis Aquas tamin’ny 1956. Tsy ny Fetin’ny Fo Masin’i Jesoa ihany akory no niainga tamina finiavan’olona tsy mpitondra ato amin’ny Eglizy. Ohatra volaohany ny Fetin’ny Sakramenta Masina izay tolokevitra sy fangatahan’i Mb Julienne de Cornillon. Anisany koa ny Fetin’ny Famindrampon’Andriamanitra, niainga avy amina andram-piainana sy hafatra tonga tamin’i Mb Faustine Kowalska. Rehefa naka ambony naka ambany ny Eglizy dia nandray ireo hafatra na fangatahana ireo ka nampiditra azy amin’ny tetiandro litorjika. Ankalazaina eran-tany ireo fety ireo ankehitriny.

Fanokanan-tena amin'ny Fo Masin'i Jesoa

Tena derain’ny Papa Pie VI ny fanajana ny Fo Masin’i Jesoa, amin’ilay taratasy misy fitomboky ny Papa Auctorem Fidei. Amin’ilay taratasy Ansiklikan’ny Papa Léon XIII Annum Sacrum, navoakany tamin’ny 25 mey 1899 kosa no nanokanany ny isam-batan’olona ho an’ny Fo Masin’i Jesoa. Tany ho any amin’ny fisasahan’ny taonjato faha 19 dia maro ireo fanjakana, vondron’olona, fikambanan-drelijiozy nanolotena manokana amin’ny Fo Masin’i Jesoa ka nitondra izany anarana izany. I Frantsa ohatra dia natokan’ireo Mpanao lalàna eo ho eo amin’ny dimampolo eo, ho an’ny Fo Masin’i Jesoa tamin’ny 29 Jona 1873. I Equateur no firenena voalohany voatokana ho an’ny Fo Masin’i Jesoa. Aty amintsika koa dia maro ny tokantrano sy fianakaviana manolotena ho an’ny Fo Masin’i Jesoa.

Nanoratra : Tsiky Marcel (Grand Séminariste Diôsezy Ambositra)