Ekiomenisma

Ny ekiomenisma dia fihetsiketsehana iraisam-pinoana izay miezaka ny hampandroso ny asa iraisana eo amin' ny firehana maro ao amin' ny kristianisma, na dia misy aza ny fahasamihafan' ny foto-pampianaran' izy ireo, ka ny tanjona dia ny "firaisana hita mason' ny Kristiana". Nanomboka tamin' ny fiafaran' ny taonjato faha-19 no nampandroso ny ekiomenisma izay lasa azo tsapain-tanana ankehitriny amin' ny fisian' ny fifanarahana maro, ny sehatra ifampiresahana maro, ny fanatanterahan-javatra azo tsapain-tanana toy ny fandikan-teny ny Baiboly na ny herinandro fiaraha-mivavaka ho an' ny firaisan' ny Kristiana. Isan' ireo mpisava lalana amin' ny ekiomenisma ny patriarka grika ôrtôdôksa Germanos V an' i Kônstantinôpôly, ny eveka anglikana amerikana Charles Brent, ny pastora nohavaozina neerlandey Willem Visser 't Hooft, ny pretra katôlika fratsay Yves Congar, ny arseveka loterana soedoà Nathan Söderblom ary ny laîka amerikana John Mott. Ireto farany ireo dia nahazo ny loka Nobel ho an' ny fandriam-pahalemana noho izany ezaka nataon' izy ireo izany.

Fiforonan-tenyModifier

Ny teny hoe ekiomenisma dia avy amin' ny ova-matoanteny grika hoe οἰκουμένη / oikouménê, avy amin' ny matoanteny hoe οἰκέω / oikéô (midika hoe "monina aho") izay tokony fenoin' ny teny hoe γῆ / gễ (midika hoe "tany") ka ny hevitr' izany dia hoe " [tany] onenana". Izany dia mandika ny toetra an-jiaby izay nampiasaina mba hilazana, tamin' ireo taonjato voalohan' ny kristianisma, an' ireo kônsily atao hoe "ekiomenika", talohan' ny nampiasana io teny io amin' ny heviny ankehitriny. Tamin' ny taonjato faha-19 anefa vao niseho ny fihetsiketsehana kristiana mikendry ny firaisana, izay fantatra amin' ny hoe "fihetsiketsehana ekiomenika". Tamin' ny fivorian' ny Fiombonana ara-Pilazantsara Maneran-Tany (frantsay: Alliance évangélique mondiale; anglisy: World Evangelical Alliance) tao Lôndra tamin' ny taona 1846 no nampiasan' i Adolphe Monod voalohany ilay teny hoe ekiomenisma amin' ny heviny ankehitriny. Ny ekiomenisma dia tsy afangaro amin' ny "fifampiresahana iraisam-pivavahana", izay manao tanjona ny fifanakalozana eo amin' ny fivavahana samihafa, na dia heno indrandray ny fitenenana hoe "ekiomenisma eo amin' ny fivavahana" mba hilazana izany.

Jereo koaModifier