Benoà XV

I Benoà XV na Benedikto XV dia evekan' i Rôma faha-258 sy papan' ny Eglizy Katôlika, nanomboka ny 3 Septambra 1914 ka hatramin' ny nahafatesany. Atao hoe Benedictus XV, izy amin' ny teny latina fa amin' ny teny italiana kosa dia Benedetto XV. Teraka tao Genoa (fanjakan' i Sardinia) tamin' ny 21 Nôvambra 1854 izy ary maty tany Rôma tamin' ny 22 Janoary 1922. I Giacomo della Chiesa no anarany talohan' ny haha papa azy. Nanamarika ny fitondrany ny famoahana ny Fehezan-dalàna kanônika vaovao tamin' ny taona 1917, dingana iray lehibe amin' ny fametrahana ny fahefan' ny papa, ary koa noho ny hetsika ara-diplômasia mahery vaika nandritra ny Ady Lehibe Voalohany.