Tahirim-Bola Iraisam-Pirenena ho an' ny Fampandrosoana ny Fambolena
Ny Tahirim-bola Iraisam-pirenena ho an' ny Fampandrosoana ny Fambolena dia andrim-bola iraisam-pirenena sy masoivoho manokan' ny Firenena Mikambana miasa amin' ny ady amin' ny fahantrana sy ny hanoanana any amin' ny faritra ambanivohitry ny firenena an-dalam-pandrosoana. Io no hany fikambanana fampandrosoana ifarimbonana izay miompana fotsiny amin' ny toekarena ambanivohitra sy ny fanjarian-tsakafo. Atao hoe International Fund for Agricultural Development (IFAD) izy amin' ny teny anglisy, fa Fonds international de développement agricole (FIDA) kosa amin' ny teny frantsay.
Ao Rôma ny foiben' ny IFAD izay mandray anjara amin' ny tetikasa maherin' ny 200 manerana ny firenena efa ho 100. Izy io dia mamatsy vola sy manohana hetsika fanatsarana ny fitantanana ny tany sy ny rano, mamolavola fotodrafitrasa any ambanivohitra, manofana sy mitaiza ny tantsaha amin' ny teknôlôjia mahomby kokoa, manangana ny fahatantezana ny fiovaovan' ny toetany, manatsara ny fidirana amin' ny tsena, sy ny maro hafa. Manana firenena mpikambana miisa 177 ny IFAD ary miara-miasa amin' ny Fikambanan' ny Firenena Mpanondrana Solitany (anglisy: Organisation of the Petroleum Exporting Countries (OPEC)) sy ny mpikambana ao amin' ny Fikambanam-Piaraha-Miasa sy Fampandrosoana ara-Toekarena (anglisy: Organisation for Economic Co-operation and Development (OECD)). Hatramin' ny taona 2021, hatramin' ny niorenany, ny IFAD dia nanome fampindramam-bola sy famatsiam-bola 23, 2 lavitrisa dôlara amerikana ary nandrindra ny famatsiam-bola iraisam-pirenena sy anatin' ny firenena fanampiny 31 lavitrisa dôlara.